موّال ورد العشق

حبّي إِلِكْ ماعاد موّال يكفيه

ولا قصيده عموديّه على كلّ القوافي

درب التواصل مزرّعه جوري ورياحين

وقلبي ناطر نلتقي, وعمره ماكان غافي

كلام الحب ماعاد تكفيه المواويل

مكيال المودة طفح, وما ظنّي عليك خافي

الروح فيك تعلّقت وكلّ الكون داري

قوّي قلبِك جاهري, ومن الحب لاتخافي

صار لك مكانه بالقلب, ماوصلها حد ثاني

وكثير مثلك حاولوا , والرد ماكان وافي

حبّي مَثَلْ بين البشر صار ينقال

كلّي وفا, وقلبي عسطح المي طافي

بكره تعالي نروح يم العين

نشفي الجرح, ونشرب ميّة نبع صافي

بالقلب غيرك ماسكن طول عمري

هذا دليلي وبدا لكلّ الناس كافي

دعينا نزرع بجنب العين ثلاث وردات

شذاها ينعش الروح , ولجرح القلب شافي

وحده إلك , وحده إلي , والثالثه للعشّاق

بييجوا لها عل العين, ومن الأحزان بتعافي

ورْدْ العِشقْ علْ العين يِنصاه كلْ مشتاق

ويقول شكرا للّي زرع هالورد, ويازينة اوصافي