موال يا عقاب

يا عقاب قل لي بالوطن شو صار

يا أردن الشومات خبّر, أيش اللي جرى وصار

بات الفساد ينمو بأرضك , وما عاد فيه أسرار

كل يوم بنكتشف فُسّاد وخلايا شر واشرار

والبرلمان يبدو انبرى يحمي حرامي الدار

****

مسكين يا شعبنا الطيّب شو صار بالأسعار

ما عاد حد قادر على الدفع بعد ما زاد العْيار

مؤسسات الوطن بتدر علينا خير لكنْ طار

كثير انباع خلسه , وتقاسمه ال باع والسمسار

****

شو صار بالفوسفات والبوتاس يا شطّار

البرلمان فيها نظر والسرقات بالمليار

الله يعينك يا شعب , يبدو الزمن غدّار

برلمان الوطن والله انكشف للناس في آذار

****

يا عقاب قل لي هل صارت الحكّام تجّار؟

كل شي برسم البيع , ولاّ الزمن علينا جار

مسكين هذا الوطن كم مرمره أمّار

صار يبكي من الأسى ,وانا حيران بل محتار

دوم الوطن غالي أبد , والناس فيه أحرار

****

يا عقاب الوطن معروض للبيع واستقطب التجار

والأرض ضاعت وأمست بأيدي الغير تندار

لا تنسوا حب الوطن مغروس فينا من يوم كنّا صغار

راح نفدي الوطن بارواحنا ويبقى موئل الثوار

****

يمّه الوطن مجروح , والقلب صار مثل النار

ضاقت علينا الفيافي, وتكاثر الفجّار

الوطن يمّه انتهب , ويا للذل والعار

بده وقفة زلم نشامى عل الوطن بتغار

****

حب الوطن رمز القداسه كان , ويبدو الزمن دوّار

صار الكل ينهش فيه  ,  ويتخزن المال باجرار

حتى المنافق غدا مسؤول , وبينطاع لو جار

غاب النشامى عن الساح , واخلوها للزمّار

ما عاد للوطن هيبه , ولا فيه جاه أو إكْبار

****

قلبي احترق ياعقاب , والعقل حار وطار

كيف ارجع المسروق وتعود بسمتنا قبل أيار

عيني عل الوطن زاد النهب وتكاثروا الزوار

لحقهم دور بالإفساد , واحْنا بنوكل المرّار

إيدي بإيدك يا أخي , نجتث كل غدّار

نواب الوطن صاروا مَثَلْ.خانوا الشعب يا جار

حامي الفساد اسْمكْ غدا , يا برلمان العار

لا تبك يا شقران يكفي , هذا شعبنا ثار

هجموا على النواب , أنظر زاد الشعب اصرار

ليعيد كل اللي انتهب , وبليل قبل نهار

لابد يطْلَعْ فجر, عيّن خيرْ, وتشعْشعْ الأنوار

والشعب يعرف مين البكى , والّلي كاد ينهار

ومين الّلي صوّتْ للشعب , ومين للفجّار

ويحاسب الّلي خان وغدر, ويعرف مين يختار

وتبان الحقيقه للبشر , وصوت الشعب معيار

كاسك يا وطن مرّت بنا , وين العم غوّار

اكتب مدد وفصول, واروي حكايا كْثار

صار النهب مشروع وللمسؤول أمسى كار

الحر يبكي دم , ويحمل من الهم قنطار

ما عاد يكفي نثر ولا موّال أو أشعار

ربي يحفظ هالوطن , ويديم الخير والأخيار

وتمحق الفاسد واللي نهب, يارب ياجبّار

جوازات سفر حمرا للنواب والاعيان , بالأخبار

وللوزير الحالي واللي رح يصير او من قبلهم صار

وطول العمر تقاعد  مرتفع, ومهما طالت الأعمار

هذي مكاسب حققوها  الكل من بعد تصويت آذار

هيك الشغل يا شعب واحلموا يصيرإصلاح أو إعمار

هذا فساد جديد يطفو عالسطح وتسابقوا بمظمار

والشعب زاد همه, واللي انبنى بالكولسات لا بد ينهار

مين كان يتوقع اللي يصير , صار العقل محتار

ربي تحمي هالوطن يكفيه , ويا ما صابته أضرار

*******

11/3/2012