يا عقاب قل لي بالوطن شو صار
يا أردن الشومات خبّر, أيش اللي جرى وصار
بات الفساد ينمو بأرضك , وما عاد فيه أسرار
كل يوم بنكتشف فُسّاد وخلايا شر واشرار
والبرلمان يبدو انبرى يحمي حرامي الدار
****
مسكين يا شعبنا الطيّب ,شو صار بالأسعار
ما عاد حد يقدر عل الدفع بعد ما زاد العْيار
مؤسسات الوطن بتدر علينا خير, لكنْ طار
كثير منها انباع , ولفلفه اللي باع والسمسار
والإتصالات كيف بيعت بعتمة ليل مو بنهار
****
شو صار بالفوسفات والبوتاس يا شُطّار
البرلمان فيها نظر, والسرْقات بالقنطار
والعبدلي قصه طويله , أخيرا بيعْ بلا إنذار
(والكازينو) حكايه مضت ما اتضح فيها قرار
وتلفلفت مثل اختفاءٍ للسفينهْ والبذار
الله يعينك شعبنا , يبدو الزمن غرّار
والبرلمان والله انكشف للناس في آذار
****
يا عقاب قل لي: هل يا ترى الحكّام تجّار؟
كل شي برسم البيع بيّنْ , والباقي للإيجار
مسكين هذا الوطن,ياحيف كم مرْمَرُهْ أُمّار
صار يبكي من كثر الأسى ,ويمكن للبكا أعذار
يا ناس الوطن غالي , وكانوا الأهل فيه أحرار
****
يا عقاب الوطن معروض للبيع واستقطب التجار
قالوا المنطقه الحره غداً بتصير جنّه للزوّار
والأرض ضاعت , وأمست بأيدي الغير تنْدار
لا تنسوا حب الوطن مغروس فينا واحنا صغار
راح نفدي الوطن بارواحنا, ويِظلْ موئل الأحرار
****
يمّه الوطن مجروح , والقلب صار مثل النار
الكهربا غليت , وصارت شربة المي بدولار
ضاقت علينا بلادنا , وصارت العيشه دمار
الوطن يا ناس انتهب , والموّال جرس انذار
بده وقفة زلم نشامى, وعلى الوطن بتغار
****
حب الوطن رمز القداسه كان , ويبدو الزمن دوّار
صار الكل ينهش فيه , والأرصده بتنعد بالمليار
كم من منافق غدا مسؤول , وبينطاع لو جار
غاب النشامى عن الساحات , واخلوها للزمّار
كان للوطن هيبه , وما عاد فيه جاه أو إكْبار
****
قلبي احترق ياعقاب , والعقل حار وطار
كيف نرجِعْ المسروق وتعود بسمتنا قبل أيار
عيني عل الوطن, زاد النهب وتكاثروا الفجّار
لِحِقْهمْ دور وملينوا , واحْنا بنوكل المُرّار
قالو (وليد) بزمن (معروف) مع (باسم) المكّار
خانوا الأمانه, باعوا الوطن بفلوس , لمّا كانوا كبار
صار الشعب مصدوم لمّا عرف , ما دبّره تجّار
والبرلمان أعتاد يعطي الثقه, ياحيف للّي صار
إيدي بإيدك يا أخي نِحْزم أمرْنا ,نجتّثْ كل غدّار
*****
نواب الوطن صاروا مَثَلْ.خانوا الشعب يا جار
حامي الفساد اسْمكْ غدا بالكون ,يا برلمان العار
ذا بني هاني تبدى يصيح ياربعي, وكشفْ أسرار
خيوط الفساد بالفوسفات أوضح من شمس أيار
لكن جهد أهل الخير ضاع, والأصوات مع التيار
لا الدمع أثمر ولا الصيحات ولا ماكان من أضرار
واقْبل ربيع العام يبكي حُزنْ ما رافقه أزهار
لا تبك يا شقران يكفي دمع , أنظر شعبنا ثار
هَجَموا على النواب ,وياما زاد الشعب إصرار
ليعيد كل اللي انتهب منّا, لو دولار أو دينار
*****
لابد يطْلَعْ فجر, عيّن خيرْ, وتشعْشعْ الأنوار
والشعب يعرف مين اللي بكى , ومين كاد ينهار
ومين الّلي صوّتْ للشعب , ومين صار مع الفُجّار
ويحاسبْ الّلي خان وغدرْ, ويحدّدْ مين يختار
وتبان الحقيقه للكّل , ويظل صوت الشعب معيار
******
كاسك يا وطن مرّت بنا , نادوا لنا العم غوّار
يكتب مدد وفصول, ويروي لنا حكايا كْثار
صار النهب مشروع , وللمسؤول أمسى كار
والحر يبكي من الألم , ويحمل من الهم قنطار
ما عاد نثر يكفي الْجرى ولا موّال أو أشعار
يارب تحفظ هالوطن , وتديم الخير والأخيار
********
جوازات سفر حمرا للنواب والاعيان , بالأخبار
وللوزير الحالي واللي راح يصير او اللي صار
وتَقاعد مرتفع طول العمر , ومهما طالت الأعمار
هذي مكاسب حققوها الكل من بعد تصويت آذار
هيك الشغل يا شعب, واحلموا بإصلاح أو إعمار
بدا الفساد يطفو عالسطح وتسابقوا بمظمار
والشعب زاد هَمُّه, واللي انبنى بالليل لا بد ينهار
معقول حد ينسى اللي انباع أو ضاع أو اللي جار
مين كان يتوقع اللي انتهب , صار العقل محتار
والوطن مقبل على فتنه كبيره,ترى روادها كبار
ربي تحمي الوطن يكفيه , ويا ما صابته أضرار
وتمحق الفُسّاد يا رب واللّي نهب, ياجبّار
